(၁)မေတ္တာတရားဟာ ဘယ်တော့မှ မဟောင်းနွမ်းဘူး။လူသတ်လက်နက်တွေ ရှိနေသရွေ့ ဖိနှိပ်မှုတွေ ရှိနေသရွေ့ မလွမ်းတဲ့လူသားတွေ ရှိနေသရွေ့ မေတ္တာတရားလည်း ဆက်ရှိနေအုံးမှာပါ။ ဖြစ်နိူင်ရင် သင့်လက်နဲ့ သစ်ရွက်လေး တရွက်ကိုသော်မှ ကြမ်းကြမ်းတမ်းတမ်း မချွေလိုက်ပါနဲ့၊ တေးသီနေတဲ့ ငှက်ကလေးတစ်ကောင် လန့်ဖြန့်သွားအောင် မခြောက်လှန့်လိုက်ပါနဲ့၊ အရာရာကို မြတ်နိူးချစ်ခင်တတ်အောင် ကြိုးစားပါ။နူးညံ့တဲ့နှလုံးသားတိုင်းမှာ နူးညံ့မှုအတိုင်းအဆနှင့်အမျှ ကြီးမားတဲ့အင်အားရှိတယ်။ ငါတို့ဟာ ဒေသနာတော်အတိုင်း မေတ္တာတရားကို ငါတို့ရဲ့အရေခွံတစ်ခုလို သယ်ဆောင်ခဲ့သူတွေ၊ငြိမ်းချမ်းမှုကို မြတ်နိူးသူတွေ၊ လွတ်မြောက်မှုကို ရှာဖွေခဲ့သူတွေ။ငါတို့ရွတ်ဖတ်ခဲ့တာ မေတ္တာသုတ်စစ်စစ်၊ ငါတို့လျှောက်ခဲ့တာ ငြိမ်းငြိမ်းချမ်းချမ်း၊ ငါတို့အာသီသရှိခဲ့တာ ငြိမ်းချမ်းမှုနဲ့ လွတ်မြောက်မှု၊
ငါတို့တရားဟာဒေသနာတော်လာတဲ့အတိုင်း မှန်ကန်တယ်။
ငါတို့တရားဟာဒေသနာတော်လာတဲ့အတိုင်း မှန်ကန်တယ်။
(၂)မေတ္တာတရားဟာဘယ်တော့မှဟောင်းမသွားဘူး၊ငါတို့ရဲ့ခေါင်းပေါ်မှာ ငါတို့ရဲ့ ရင်ဘတ်မှာ ငါတို့ရဲ့ နှလုံးသားထဲမှာ ခေတ်ရဲ့ ဆိုးဝါးရက်စက်မှုဒဏ်ရာတွေနဲ့ ငါတို့သွေးဟာ မလိုအပ်ပဲ ကျခဲ့ရပြီ၊ ငါတို့ခြေလှမ်းတွေ စိတ်မပါပဲ ကျိုးပဲ့ခဲ့ရပြီ၊ ငါတို့ မေတ္တာသုတ်တော်ကို ဆက်ပြီးရွတ်ဖတ်ဆဲ၊ ဘယ်ခေတ် ဘယ်တော့မှ ပျက်ပျယ်မသွားတဲ့ ယုံကြည်မှုနဲ့ ငါတို့ရဲ့ဒေသနာတော်ကို ဆက်ပြီးရွတ်ဖတ်နေအုံးမှာပဲ။ဘယ်လိုအတားအဆီးမျိုးနဲ့ မှ ငါတို့ရဲ့ယုံကြည်စိတ်ကို ချေဖျက်နိူင်မှာမဟုတ်ဘူး၊ လမ်းမပေါ်မှာ ရွတ်ဖတ်လို့မရရင် ကျောင်းမှာ၊ ကျောင်းမှာ အခွင့်မရှိရင် သစ်ပင်အောက်မှာ၊ သံဃအဖြစ် ဂဏအဖြစ် ပုဂ္ဂလအဖြစ် ဘယ်နေရာရောက်ရောက် ငါတို့ဆက်ပြီးရွတ်ဖတ်နေအုန်းမှာ၊ ဆက်ပြီးရွတ်ဖတ်နေရအုံးမှာ၊ ဒါဟာ ငါတို့ရဲ့ သမိုင်းပေးတာဝန်ပဲ မဟုတ်လား။
(၃)မေတ္တာတရားဟာ ဘယ်တော့မှ မဟောင်းနွမ်းဘူး၊ကာလမရွေး ဒေသမရွေး ပုဂ္ဂိုလ်မရွေး ရွတ်ဖတ်သရဇ္ဈာယ်တိုင်း ကြားနာရတိုင်း မေတ္တာသုတ်တော်ဟာ ၁၈-၈-၂၀၀၇ ရဲ့သင်္ကေတဖြစ်တယ်၊ ခေတ်သစ်သမိုင်းရဲ့ တော်လှန်ရေးသင်္ကေတဖြစ်တယ်၊ သွေစွန်းခဲ့ရတဲ့ ဗောဓိညောင်တွေရဲ့ သင်္ကေတဖြစ်တယ်၊ ကျဆုံးတိမ်းပါးသွားရတဲ့ ငါတို့ညီနောင်တွေရဲ့ သင်္ကေတဖြစ်တယ်၊ “ကမ္ဘာမကြေ”သီချင်းဟာ အမျိုးသားရေးသီချင်းဖြစ်သလို မေတ္တာသုတ်တော်ဟာ ခေတ်သစ်တော်လှန်ရေးရဲ့ ငြိမ်းချမ်းရေးလက်နှက်ဖြစ်တယ်။ တစိတ်တ၀မ်း တသဘောတည်း နာကျင်မှုရှိတိုင်း ခံပြင်းမှုရှိတိုင်း မတရားမှုကို ခံလေရတိုင်း မေတ္တာသုတ်ဒေသနာတော်ရဲ့ တစ်ပုဒ်တစ်ဂါထာဖြစ်ဖြစ် ရွတ်ဆိုလိုက်ပါ၊ ဒါဟာငါတို့အားလုံး ဆန္ဒကို တောင်းဆိုတာပဲဖြစ်တယ်။
(၄)မေတ္တာတရားဟာ ဘယ်တော့မှ မဟောင်းဘူး၊
အဲဒီအတွက်
မေတ္တာသုတ်တော်ကို
မတရားမှုတော်လှန်ရေးရဲ့
တိုက်ခိုက်ရေးသင်္ကေတအဖြစ်
ငါတို့သတ်မှတ်အတည်ပြုကြစို့။ ။
နေမွန်းသင်
၈-၁၀-၀၇
No comments:
Post a Comment